20 نصيحة قبل أولى جامعة...ادخل وشوف!!

بقلم محمد صلاح العزب
فى جريدة حياتنا
أهم 20 نصيحة لطلاب الثانوية العامة قبل سنة اولى جامعة

على فكرة هوا رغى كتير بس تحفة وطريف أوى والله اصبرو لحد الآخر
ومعلش هستأذنكو اكتب كل خمسة فى مرة عشان ممكن الجهاز يفصل
متفقين
!!!
يلا بينا

*******************************************************************
النصيحة فى وسط الناس فضيحة، وانت هنا لست أمام نصيحة واحدة ،
بل عشرين وليس أمام الناس فقط ،
بل فى جريدة سيارة(ودلوقتى كمان فى منتدى عالمى)وهو ما يعنى اننا نقدم
لك نصيحة بجلاجل ، فافهم واتعظ واعلم وتعلم ،وكما قال المثل
انصح طالب الجامعة الجديد من الصبح الى الظهر ، فان لم يأخذ بالنصيحة فالأفضل أن تضله عن الطريق القويم

والان طرطأ ودانك وافتح عنيك واقرا بتمعن

1)_احمد الله على خروجك من المدرسة سليما معافى

الجامعة تاج على رءوس الطلاب لا يراه إلا تلاميذ المدارس.
مرحبا بك ياأخى وقد تحررت من يونى فورم المدرسة وجئت الى هنا مرتديا أبهى حللك
وقد رميت حقيبة المدرسة وأتيت ممسكا بكشكول سلك عليه قلب أحمر أو كلب أبيض
تستنشق عبير الحرية وكنت قبل هذا لاتعرف أن للحرية عبيرا من الآن فصاعدا ،
مااشوفكش مكشر خلاص مافيش ناظر ولا طابور ولا تحية علم ولا تذنيب ولا ضرب ، بقيت بيه
يعنى شوف بقى فى كام مليون تلميذ فى مراحل التعليم المختلفة بيحسدك على اللى انت فيه
بوس إيدك وش وقعر واوعى تبقى قد المسئولية
قصدى
خليك أكبر منها يعنى



2)_ليس بكليات القمة وحدها يتميز الإنسان

إذا كان مجموعك كبير وألقى بك التنسيق فى كليات القاع.. لا تحزن
فهذا التقسيم لم ينزل من السماء ورب محاسب شاطر أفضل من طبيب فاشل
ورب مدرس يحصل على 20 ألف جنيه شهريا من الدروس الخصوصية أفضل
من وزير الرى والموارد المائية وإذا كنت لاتعمل ماتحب فكبر دماغك
وعيش ، احمد ربنا انك دخلت ثانوية عامة وكلية أياكانت مش احسن من
الى احلامهم اتكسرت بدرى ودخلو دبلومات خش انت بس كدة ومتقلبش وشك
هتتبسط




3)_دعك من العبارات المتداولة والشائعات المغرضة والأقاويل المحبطة

إذا دخلت طب هيقولولك طب من بقك وإذا دخلت بيطرى هيقولولك يابتاع البهايم
وإذا دخلت زراعة هيقولولك (عايزنها تبقى خضرا) وإذا دخلت تجارة هيقولولك
كلية الشعب
اشترى كيس قطن طبى أوحتى تنجيد وسد ودانك ماهؤلاء ياأخى إلا((منفسنين)) أو من
دعاة الإحباط ، هيقولولك عين شمس أصعب من القاهرة
وحلوان أرخم من جنوب الوادى وهتسمع إن الدكتور ده بيسقط والتانى دة كتابه غالى
والتالت ده رخم مع الطلبة فلوسك فى جيبك وكيس قطنك فى إيدك سد وامشى





4)_افتح عنيك واغلق فمك واتبع التعليمات

لاتاخذ الدنيا قفشا ومتقعدش تعمل نفسك نائب رئيس الجامعة لشئون الكلام عمال على بطال
اهدى كدة واستريح وقبل ماتقعد تفتى وتردد الكلام الى بتسمعه استوعب الى بيحصل حواليك
انت الآن فى مجتمع جديد له قواعد وقوانين مختلفة
لسنا فى مدرسة ولافى أتوبيس عام ولا فى سينما التزم سلوك الطالب الجديد
ولا تقلد شباب اليومين فى سلوكياتهم المزرية
هتسألنى يعنى إيه مزرية؟؟
وهقولك دى بقى هتعرفها فى سنة تالتة على الأقل






5)_قم للدكتور وفه التبجيلا ..أحسن لك

حضرتك الآن فى حرم والاحترام واجب سيبك بقى من حركات المدارس الى من نوعية
انك تهزر مع المدرس أو تتريق عليه ، ولاتحطله بودرة عفريت عالكرسى ولا
تركبله ديل ، شغل مدرسة المشاغبين ده مالوش مكان هنا لأن دكتورك ببساطة شديدة
ممكن فى أى تغيير وزارى يتحول لوزير أو رئيس وزراء ، عمرك انت سمعت عن رئيس
وزراء حد ركبله ديل؟! طبعا كل ده بجوار ان دكتور الجامعة أفضل عمليا
من رئيس الجمهورية ومن المحافظ ومن تامر أمين
لكن تعمل إيه بقى هى الدنيا كدة


*********************************************
ماتزهقوش لسة بدرى
ده أنيل من نصائح الجواز
!!!!!!!!!!!!!!1

6)_المعيد عن العين معيد عن القلب

من هو المعيد؟ هوطالب دحيح كان زملاؤه يمشون مع البنات ويجلسون فى الكاففيتريات،
ويزوغون من المحاضرات بينما هو قابع فوق الكتاب يأكله ويشربه ويلبسه
حتى خرج من الكلية بمرتبة الشرف الرفيع الذى لا يسلم من الأذى إلا بإجراءات روتينية
صعبة ، والمعيد لديه مشكلة أساسية هى ان الطلاب يتعاملون معه باعتباره حتة طالب
بس شايف نفسه شوية
وهو يريد ان يتم معه باعتباره دكتورا ومن هنا تنشأ المشكلة
وانا هنا أنصحك بان تعطى للمعيد برستيجه سواء استحقه ام لا
وهذا لسبب بسيط لأن البرستيج لا بيأكل ولا بيشرب ولا بيتدفع فيه فلوس





7)_لا تتسرع

يعنى بالعربى ماتستعجلش على حاجة ، أى حاجة
كل شيء هييجى فى وقته
الكتب هتييجى فى وقتها، والكارنيه هييجى فى وقته ، والأصحاب هييجو فى وقتهم
وهتفهم كل حاجة فى وقتها ،ولما تبقى مستعجل هتبقى مرتبك وهتقع فى اخطاء أكتر
اهدى على نفسك وخليك تقيل واعرف كويس انه ماطار طيرا وارتفع
إلا كما طار خلع
!!
نسيت اقولك
ان البنات كمان هييجوا فى وقتهم




_سلام مربع للحرس الجامعى

الجامعة مثل العين تماما فكما أن العين عليها حارس فالجامعة أيضا عليها حارس
لكن الأخير يختلف فى انه يطلب الكارنيه عند الدخول ويتلقى التقارير من الطلبة المخبرين
ويتدخل فى كل شيء فى العملية التعليمية بدءا من قبول الطلاب وحتى تعيين العمداء ولهم دور
جلل فى سلق وشى وتحمير انتخابات اتحاد الطلاب
من البداية حدد موقفك فأنت إما مع الأمن أو ضد الامن
أو ملكش دعوة
فإذا كان ملكش دعوة فقد أرحت واسترحت أما إذا اخترت أن تكون((مع)) فألف مبروك
وإذا اخترت ان تكون ضد فلا يسعنا فى هذا المقام إلا أن نقول لك فرصة سعيدة
وإلى اللقاء





9)_كل الأوراق كاذبة

بمجرد أن يلمحوك وقد دخلت الجامعة واستقرت قدماك بها سينهالون عليك بالأوراق
لا تسالنى من هم فتقريبا كل الذين فى الجامعة باستثناءك سيحاولون بشكل أو بآخر أن
يعطوك ورقة
ومعها ابتسامة آلية يمنحونها لكل المستجدين من أمثالك لأنك بالنسبة
لأصحاب هذه الاوراق إما زبون أو صوت انتخابى أو عضو فى الجامعة
ستجد إعلانات عن مراكز تعليمية بإمكانها ان تحولك إلى عالم فى الذرة
فى اسبوع وربما بدون معلم
وإعلانات عن مكتبات تضرب كتب الأساتذة وتبيعها بربع الثمن ، وعن مكاتب
تصوير المستندات بأسعار خاصة للطلبة
وعن غرف مفروشة للمغتربين وعن أسرة الديك الفكسان
!!
وعن ساندوتش المعلم الذى يقضى على الجوع والطلاب نهائيا





10)_إياك والمدبلرين

من هو المدبلر؟؟ المدبلر هو طالب يمتلك شهادة خبرة فى الكلية يأخذ السنة فى سنتين
وثلاث وأربع لخمول فى نفسه وضعف فى تحصيله وكسل فى ذهنه وتراخ فى أدائه
والدبلرة إن كنت لا تعلم مرض ((معدى)) فتاك ينتقل بالمصاحبة والمرافقة والمجالسة
على الكافيتريات والمقاهى وحتى بالمرافقة فى المواصلات والمرواح والمجى
انقظ نفسك من المصير المظلم واسمع ما قاله الحكيم لابنه
قال له: لاتصاحب المدبلر ولا تخلى المدبلر يصاحبك
لوكان نفع نفسه مكنش فضل جنبك

11)_الشيطان شاطر ..صاحبه حتى تاخذ منه المحاضرات

وهذه أفضل نصيحة يمكن ان تحصل عليها إذا كنت من (المأنتخين ) فالمأنتخ فى اللغة
هو الطالب الذى لا يحضر المحاضرات ولا يؤجل عمل اليوم إلى الغد ولكن إلى آخر السنة
وفى هذه الحالة ستحتاج إلى الملخصات والمراجعات والمحاضرات فإذا كنت مصاحب واحد من الدحيحة
فستحصل على كل هذا بسهولة وإلا فطريقك
مسدود مسدود ياولدى
!!
وأيا كانت شخصية هذا الدحيح صاحبه وتحمله حتى تحصل ما تريد
فأنت تحتاج إلى شطارته فقط ولا علاقة لك بصفاته الأخرى





12)_ستف أولوياتك

بمعنى هل انت رايح الجامعة عشان تفك من خنقة أبوك وامك
وخرجت امتى ورجعت امتى وقاعد مع مين وخرجت مع مين، ولا رايح الجامعة
عشان تقولهم انا كبرت وتقدر تحط علبة السجاير فى جيب القميص ، ولا عشان
تعلق مزز!! ولا عشان تروش نفسك وتلبس سلسلة جنزير وتى شيرت عليه
(جينيفر لوبيز))ولا عشان تتعلم)
أنا شخصيا اعرف سبعة كانو رايحيين يتعلمو وبعدين غيرو رأيهم
حدد أولوياتك بس فكر كويس بعد الاربع سنين بتوع الجامعة ما يخلصو دنيتك
هتمشى إزاى
؟؟





13)_سيب مسافة عشان ترجع بضهرك

أول ما تدخل الجامعة اتعامل مع نفسك باعتبارك عربية على الزيرو ، لأن
اللى جايب عربية جديدة بيبقى خايف عليها لحسن تتعفر او تتوسخ او تمشى فى مطبات
أو لاقدر الله تتخدش ولا تعمل حادثة، خليك كدة بالظبط
امشى واحدة واحدة ، وخلى عينك فى وسط راسك
اوعى تخبط فى حد ولا تخلى حد يخبط فيك أوعى تشوف واحدة حلوة
بس مصاحبة فتروح راكن صف تانى
!!
ولما تلاقى نفسك فى موقف ملوش حل غير انك تعترف بغلطك
اعترف واعتذر وماتمشيش عكس الاتجاه خليك دايما رابط حزام الامان على تصرفاتك
لانك فى لحظة ممكن تلاقى عجلة القيادة فلتت من إيدك
وأخيرا لو جيت ركنت فى اى مكان أو مع أى حد سيب مسافة كافية لانك ترجع
بضهرك وتمشى بدل ماتتفاجيء انك اتزنقت ومش عارف تفلفص






14)_ابدأ من حيث انتهى الآخرون

شوف الجماعة الآخرين دول عملو إيه واتعلم من أخطائهم
ايه اللى يخليك تقع فى مشكلة لسه واحد واقع فيها قدامك ،
وإيه اللى يخليك تعتقد إنك الواد الجامد اللى هينجز كل اللى مااتنجزش ،
هتلاقى أسر واتحاد طلاب رسمى واتحاد طلاب موازى وهتلاقى حزب وطنى وإخوان مسلمين
وجماعات إسلامية مش بعيد تلاقى عيال من بتوع عبدة الشيطان وأشباههم
رجعو تانى ، اقف بعيد وراقب كويس،
وحدد اتجاهاتك ، وقبل ماتتورط فى حاجة ، شوف اللى دخلو فى الحاجات دى
خرجو عاملين ازاى ، واتاكد انك غالبا
مش هتختلف عنهم كتير






15)_الرابعة: كلنا ولاد ((جامعة)) وبنسعى

عارف الحكاية اللى كانو بيقولوهالنا زمان بتاعت كلنا ولاد تسعة وبنسعى،
فى الجامعة نفس النظام ، بتاع اقتصاد وعلوم سياسية زى بتاع دار علوم ، ابن الوزير
زى ابن الوز ، لأن اللى مش هيبقى عوام هو اللى خسران ،
وهى دى فرصتك عشان تبقى متميز وزى ماكلنا شفنا فى فيلم
رد قلبى
إزاى على ابن عم عبد الواحد دخل الكلية الحربية
انت كمان ممكن تتفوق وتحب انجى وحتى لو مااتجوزتهاش
كفاية اوى انهم هيعملولك فيلم عربى

16)_متصدقش الجامعة بتاعت التليفزيون والسينما

اللى هى نضيفة وجميلة والبطل عنده 40 سنة ولسة فى سنة أولى
والبطلة عندها 45 سنة وزميلته وشوف بقى لو جابو محاضرة من جوه
تلاقى الكومبارسات والكومبرسة باينة على وشوشهم
فاكر مرجان أحمد مرجان
بالزمة دى شكل جامعة ولا دول شكل طلبة
ولا دى مناظر دكاترة
انسى كل ده وانت رايح عشان ما تتفجأش






17)_ ابتعد عن المناطق المظلمة ..ماتشبهش نفسك

احذر من ممرات جيمى وجومانا وكرير لو كنت فى عين شمس
وستلرز وسكوير لو فى القاهرة
وطرائيعو لو فى بنها
اعلم ان أول شيئ ستفعله حين تذهب إلى واحدة من الجامعات الثلاث انك
ستسأل عن هذه الممرات
يقولون والعهدة على الرواة!! ان هذه المناطق تكون مظلمة
حتى فى وضح النهار، ويحدث فيها مايحدث فيها مايحدث فى دور العرض
السينمائية حين يغلقون النور ، انا شخصيا لاامنعك من متعة الأكتشاف
بس ابقى احكيلنا
!!!
حاول ما تتخرجش






18)_اضحك الصورة تطلع ديجيتال

هذه المرحلة باختصار هى أفضل مرحلة فى حياتك
ستعرف هذا بمجرد أن تخرج منها فاحرص على اقتناء اكبر قدر من الصور
حتى تشاهدها عندما تكبر وتتجوز وتخلف وينبت لك كرش عظيم ! وصلعة شاسعة مترامية
الأطراف
حينها ستجلس امام الصور وتقسم لأولادك انك هذا الولد الروش الذى فى الصورة
وبالطبع لن يصدقوك
وسيقولون لبعضهم بصوت ستسمعه
((ده هيهجص علينا)) !!!!






19)_فضل أن تكون طالبا على ان تكون خريجا

حين تتخرج أيا كانت شهادتك ستحصل غالبا على أكثر من وظيفة مرموقة
مر بها معظم من سبقوك وهى وظيفة
((جالس عالمقهى)) لهذا فأنت فى الجامعة فى افضل حال
شاب نظيف لطيف تأخذ مصروفك من ابيك وتعيش غالبا
قصة حب ملتهبة، ولا يطالبك أحد بشيء وينظر إليك المجتمع نظرة إعجاب
وإكبار ، إيه بقى اللى يخليك تسيب النعمة دى مقابل لاشيء ، إيه اللى يخليك تبيع ماتدرى
بما لا تعلم
امسك فى الجامعة بإيدك وسنانك، وتاكد ان أفضل شيء فى العالم هو
الرضاعة الطبيعية






20)_والأخيرة ومسك الختام: اوعى تعمل بأى واحدة
من ال19 نصيحة اللى فاتو

هذه النصيحة هى الوحيدة التى لابد منها ، لأن أثقل شيء على النفس البشرية
هى النصيحة ، وهذا ماادركه الأولون وتحكى الكتب العتيقة ذات الأوراق الصفراء ،أن
النصيحة تم اختراعها أصلا حتى يخالفها الناس
وإلا لما وصلت الإنسانية لما هى عليه الىن ، عموما
خض تجربتك بنفسك
و((خض)) هنا ليس معناها أن تقول لها ((بخ)) ولكن
عيش واتكعبل وقوم واتعلم ، مفيش حاجة الواحد بيتعلمها ببلاش ومفيش وتشبيه،
ومفيش حاجة تيجى كدة اهدى حبيبى كدة
واوعى ترجع زى زمان




**************************************
آآآآآآآآآآآآآآآآآآآآآآآآآآآآآآآآآآآآآآآآآآآآآه
صباعى ورم والله من الكتابة بقالى ساعتين باكتب يارب تنفعكو
، قصدى ماتنفعكوش
عاوزة اعرف رايكو
ادخلو بسرعة




كتب بواسطتى فى جميع المنتديات
وغير منقوووووووول
!!!!!